***** ગણેશ ચતુર્થી – “વડિલ અભિવાદન દિન મનાવો !!!” *****

***** ગણેશ ચતુર્થી – “વડિલ અભિવાદન દિન મનાવો !!!” *****

મારાં વ્હાલા સ્વજનો અને પ્રિય મિત્રો, આપણો સમાજ આવતી તારીખ 11 સપ્ટેમ્બર 2010 ને ભાદરવા સુદ ચોથના દિવસે કોઈપણ જાતના ભેદ-ભાવ વગર ગણપતિનું પૂજન-સ્થાપન્ કરશે ! અને ખુશ ખુશાલ બની મહોત્સવ મનાવશે !

ત્યારે આ ક્ષણે ! આવો આપણે સૌ આપણાં પોતાના ગણ-પરિવાર-ના પતિ અર્થાત વડા/વડિલ અર્થાત દાદા-દાદી કે માતા-પિતાનો પણ ગણપતિની સાથોસાથ માન-આદર અને સત્કાર કરી તેમના તરફ કૃતજ્ઞનતાની લાગણી વ્યકત કરી કૃત્-કૃતાર્થ થઈએ ! અને આપણો પરિવાર આવનારા દિવસોમાં તેમના તથા ગણપતિના આશીર્વાદથી વધુ અને વધુ ફાલે-ફુલે અને અનેક નવી સિધ્ધિઓ હાંસલ કરે તેવી બંને સમક્ષ વંદન કરી પ્રાર્થના કરીએ !

આજના આ શુભ-દિવસને પરિવારના વડા/વડિલ અર્થાત દાદા-દાદી કે માતા- પિતા તરફ કૃતજ્ઞનતા વ્યકત કરવાના દિવસ તરીકે ઉજવીએ અને સમગ્ર પરિવાર ખુશ્-ખુશાલ અને મઘ્-મઘતો બની રહે તેવું પ્રાર્થી આ દિવસને એક નવું પરિમાણ આપી રહીએ !

ફાધર્સ ડે, મધર્સ ડે, ફ્રેંડશીપ ડે વગેરે પશ્ચિમના આંધળા અનુકરણ કરનાર હે ભારતીયો ! આવો આજે આ દિવસને વડિલ અભિવાદન દિન તરીકે ઉજવી એક નવી ભારતીય પ્રણાલીકા સ્થાપીએ અને ઘેર ઘેર આ દિવસને ગણપતિ સાથે જ પરિવારના વડા/વડિલ તરફ કૃતજ્ઞનતા વ્યકત કરવાનો દિવસ તરીકે વર્ષો વર્ષ મનાવતા રહીએ અને તેજ રીતે આ પવિત્ર દિવસને “વડિલ અભિવાદન દિન” તરીકે ઓળખ પણ આપી રહીએ !
મને વિશ્વાસ અને શ્રધ્ધા છે કે આપ સૌ મારી આ વાત સાથે સહમત થશો અને આપના પરિવારમાં આ દિવસને મનાવશો ! અસ્તુ !!
સ-સ્નેહ
અરવિંદ

નોંધ:- આ સાથે ગણપતિ-ગણપતિનો જ્ન્મ્-ગણપતિનું સ્વરૂપ્-ગણપતિનું પૂજન-ગણપતિનું વાહન ઉંદર વગેરે વિષે વિગતથી મારાં વિચારો દર્શાવતો એક લેખ મારા બ્લોગ ઉપર મૂકેલ છે જેની લીંક નીચે આપી છે જે વાંચી-વિચારી આપના પ્રતિભાવો જણાવવા વિનંતિ છે. https://arvindadalja.wordpress.com/ગણપતિ/