પ્રોજેક્ટર – ડૉ. કૌશિક ચૌધરી હિંદુરાષ્ટ્ર બનવાથી આ દેશની હાલત શું થશે તેનું ટ્રેઈલર શરુ થઈ ચૂક્યું છે…

પ્રોજેક્ટર – ડૉ. કૌશિક ચૌધરી     હિંદુરાષ્ટ્ર બનવાથી આ દેશની હાલત શું થશે તેનું ટ્રેઈલર શરુ થઈ ચૂક્યું છે…

ગુજરાત સમાચાર 18,ઓક્ટોબર,2015, રવિ પૂર્તિમાંથી સાભાર

જ્યાં સુધી હિંદુ હોવાનો સાચો અર્થ જનમાનસમાં સ્થાપિત નહીં થાય ત્યાં સુધી હિંદુ રાષ્ટ્રનો વિચાર આ દેશના ભવિષ્ય માટે જોખમકારક છે ૧૬મી મે, ૨૦૧૪ના દિવસે સોળમી લોકસભાનું પરીણામ આવ્યું અને એક ખુલ્લો સંદેશ ભારતીય રાજનીતિમાં ગયો. એ સંદેશ હતો કે મુસલમાન કોઈ વોટબેંક નથી. એ ભારતીય નાગરીક છે. અને છતાંય જો તેને વોટબેંક બનીને જ એકસાથે વોટીંગ કરવું હોય તો સમજી લે કે આ દેશમાં ૭૯ ટકા હિંદુઓ છે અને સરકાર તેમની જ બનશે. આ એક સ્પષ્ટ સંદેશ હતો જે ભારતની દરેક રાજનૈતિક પાર્ટીએ સમજવો પડયો. એ.કે. એન્ટોનીએ કોંગ્રેસની હાર માટેના જે કારણો રજૂ કર્યા તેમાં એક જ મુખ્ય કારણ મુસ્લિમ તુષ્ટીકરણ હતું. અને એટલે જ મુસ્લિમ તુષ્ટિકરણને જ પોતાની યુએસપી માનતી પાર્ટીઓએ હિંદુ વિરોધી વલણને દૂર કરવાની કોશિશ શરુ કરી. તાજેતરમાં બનેલા દાદરી કાંડમાં એક મુસ્લિમ ગૌમાંસ ખાય છે એવી માત્ર અફવાના પગલે એક ધર્મઝનૂની ટોળાએ તેની હત્યા કરી દીધી. મુલાયમ સિંહ યાદવે તેની રીપોર્ટ કેન્દ્ર સરકારને મોકલી તો એમાં ગૌમાંસનો મુદ્દો જ ગાયબ હતો. રાહુલ ગાંધી તે ગામમાં જઈને આવ્યા અને ટ્વીટર એક જ કોમેન્ટ આપી કે ત્યાંના લોકો શાંતિ જાળવવા કટીબધ્ધ છે. આમ, જે હિંદુ રાષ્ટ્ર બનાવવાના સ્વપ્ન સંઘે જોયા હતા તેનું એક ટ્રેઈલર તો કમસે કમ હવે શરૃ થઈ ચૂક્યું છે. અને એટલે જ એનું સર્વગામી પૃથ્થકરણ કરવું જરૃરી છે કે આ ટ્રેઈલર ભારતના અને સનાતન હિંદુ ધર્મના ખરેખર કેટલા ભલામાં છે અને કેટલા બુરામાં. આ રાજનૈતિક પરીવર્તનના કારણે એક વર્ષમાં ન્યૂટનના ત્રીજા નિયમ મુજબ ઓવેશી જેવા કટ્ટર મુસ્લિમ નેતાઓ અને આતંકવાદીઓના હાથા બની ચૂકેલા કશ્મીરી મુસલમાનો પહેલાથી વધુ ઉગ્ર બન્યા અને આ કારણે દેશમાં ધર્મનું રાજનિતીકરણ વધુ તેજ બન્યું. બીજી તરફ ગુજરાતને ફરીથી રાજનિતિની લેબોરેટરી બનાવવામાં આવી પણ આ વખતે ધર્મના સ્થાને પૃષ્ઠભૂમિ તરીકે જાતિ હતી. રાજ્યમાં એક એવી જાતિએ અનામત મેળવવાની આક્રમક માંગ શરૃ કરી જે આર્થિક રીતે સૌથી સંપન્ન અને શૈક્ષણિક રીતે સૌથી વધુ જાગૃત હતી તેમજ રાજ્યમાં મુખ્યમંત્રીથી લઈને આઠ મંત્રીઓ અને ૪૪ ધારાસભ્યો ધરાવતી હતી. જાતિ આધારીત આરક્ષણ દૂર કરવા શરૃ થયેલા આ પ્રયોગમાં રાજ્યની પછાત જાતિઓનું અનામતનો લાભ લેવાના આરોપસર વારંવાર અપમાન કરવામાં આવ્યું. સરદાર જેવા રાષ્ટ્રીય લોકનાયકને એક જાતિની પ્રાઈવેટ પ્રોપર્ટી બનાવી દેવાઈ અને તેમના નામનો ઉપયોગ એવા વિચારો માટે કરવામાં આવ્યો જેનાથી સરદારને પોતાને નફરત હતી. કરોડોની સરકારી સંપત્તિને આગ ચાંપવામાં આવી, કેટલાક નિર્દોષ યુવાનોએ જીવ ગુમાવ્યા અને અસામાજીક તત્વોને પોતાની વિકૃતિઓ બતાવવાનું ખુલ્લું મેદાન મળ્યું. સરકારે તરત જ બિનઅનામત જાતિઓના ગરીબ અને મધ્યમવર્ગીય પરીવારો માટે લાભદાયી પેકેજ જાહેર કર્યું અને કેટલીક જોગવાઈઓ દૂર કરી ન્યાય કર્યો. પણ હજીયે આંદોલન ચાલુ છે અને આંદોલનના નામે તોફાનો મચાવતા, લોકોના ગુપ્તાંગ કાપી નાખવા અને રાજ્યના પોલીસ અધિકારીઓને મારી નાખવાનો આદેશ આપતા લોકો ખુલ્લે આમ ફરી રહ્યા છે. અને સરકાર કોઈ કારણસર ચૂપ છે એટલે આગળ શું થશે એ એક રહસ્ય છે.
જેમ હંમેશા થયું છે તેમ ગુજરાતનો પ્રયોગ દેશમાં આગળ વધ્યો અને આરએસએસ સુપ્રીમોએ બહાર આવીને વર્ષો જૂના પોતાના અનામત વિરોધી એજન્ડાને આગળ ધર્યો અને એટલામાં તો લાલુ અને માયાવતી મેદાનમાં આવ્યા. લાલુએ ”કોઈના બાપની તાકાત હોય તો અનામત હટાવે” જેવા ખુલ્લા જાતિવાદી નિવેદનો આપીને આખા બિહાર ઈલેક્શનને ઉજળિયાત જાતિઓ વિરુધ્ધ પછાત જાતિઓની લડાઈનું રૃપ આપી દીધું. માયાવતીએ પણ ‘મરી જઈશ પણ અનામત નહીં જવા દઉં’ના ડાયલોગ મારી દલિત સમાજને ટાઈટ કર્યો. આજે પણ ગુજરાતમાં અમેરીકાની શેરીઓમાં, ઝુકરબર્ગના ફેસબુક એકાઉન્ટમાં અને રાજકોટ વન ડે મેચમાં અનામત માગવાના અને બિહારમાં આગલી અને પાછલી જાતિઓને લડાવવાના નવા નવા નુસખા રોજ બહાર આવી રહ્યા છે. ૨૦૧૪ની લોકસભા ચૂંટણીમાં જે મુસલમાન સમાજના વિરોધમાં મતદાન થયું એ તો બિચારો ચૂપચાપ પોતાના ઘરમાં બેઠો ધંધો કરી રહ્યો છે. જ્યારે આ આખો નગ્ન નાચ તો આપણા એ જ તથાકથિત હિંદુરાષ્ટ્રનો છે જેની આજ સુધી આપણે રાહ જોઈ રહ્યાં હતાં.
મુસ્લિમ અને અંગ્રેજ સંસ્કૃતિ આ દેશમાં આવી અને પહેલા પણ આ દેશમાં જાતિઓ વચ્ચેનો આ જ નગ્ન નાચ ચાલતો હતો. સો ટકા હિંદુઓના દેશમાંથી જો આજે ૭૯ ટકા હિંદુઓ થઈ ગયા હોય તો એના પાછળ આ જ સ્વાર્થી જાતિવાદ છે. ભારતના એ સત્તર કરોડ મુસલમાનો અને ત્રણ કરોડ ખ્રિસ્તીઓ કોઈ વિદેશમાંથી આયાત નથી થયા. તે આ દેશના જ શોષિતો હતા જેમને તેમના જન્મના કારણે તુચ્છ ગણીને અડકવા લાયક સમજવામાં નહોતા આવ્યા. અને આ પૃથ્વી ઉપર જન્મ લીધા પછી કંઈક સન્માનજનક જીવન જીવી શકાય તે માટે તેમણે વિદેશી સંસ્કૃતિ અને વિદેશી ધર્મનો આશરો લીધો. પરંતુ હિંદુરાષ્ટ્રની એક નાની ઝલક જ જો આવી છે કે જ્યાં કહેવાતી ઉચ્ચ જાતિઓ પોતાના આર્થિક શક્તિ પ્રદર્શન અને રાજનૈતિક મીલીભગતના જોરે પોતાની સામાજીક સત્તા થોડીપણ ઢીલી પડવા દેવા તૈયાર નથી. જો શોષિત અને કચડાયેલા વર્ગને દબાવી રાખી તેમના ઉપર રાજ કરવાની તેમની માનસિકતા આજે પણ એમની એમ જ છે તો એનો અર્થ એ છે કે સદીઓ વીત્યા પછી અને આટલી યાતનાઓ વેઠયા પછી પણ હિંદુ સમાજમાં કંઈ બદલાયું નથી. આપણે આપણી ભૂલોમાંથી કંઈ નથી શીખ્યા. આથી જો હિંદુરાષ્ટ્ર કદાચ બન્યું પણ તો જે લોકો આજે હિંદુ અને મુસ્લિમને અલગ પાડીને રાજ કરે છે તે પછી બ્રાહ્મણને ક્ષત્રિયથી અને ક્ષત્રિયને વૈશ્યો અને શુદ્રોથી અલગ પાડીને રાજ કરશે. જે લોકો આજે એમ કહે છે કે આ દેશ હિંદુઓનો છે તે પછી એમ કહેશે આ દેશમાં બ્રાહ્મણ સૌથી ઉચ્ચ છે કારણ કે તે વિષ્ણુના માથામાંથી પેદા થયો છે અને શુદ્ર તુચ્છ છે કારણ કે તે વિષ્ણુના પગમાંથી પેદા થયો છે. ગાંધી અને દીનદયાલ ઉપાધ્યાય જેવા એક બે વિચારકો તો ઉત્પન્ન થઈ જશે પણ એમની વાતો તાળીઓ પાડવા અને ચોપડીઓમાં ભણાવવા પૂરતી જ રહેશે. સમાજ એવો જ રહેશે જેવો આટઆટલી ગુલામી વેઠયાના બારસો વર્ષ પછી પણ આપણે જોઈ રહ્યા છીએ. જાતિને જ આપણો સમાજ માની બેઠેલા આપણને ઘોર આત્મમંથનની જરુર છે. એક બહુ મોટા વૈચારીક મંથનની જે આપણને જાતિગત સ્વાર્થની હદોથી બહાર લઈ જઈ શકે અને એકબીજા માટે વિચારતા કરી શકે. કારણ કે જાતિગત સ્વાર્થની આ પરાકાષ્ઠામાં આપણામાંથી કોઈ નિર્દોષ નથી. જનરલ કેટેગરીવાળો પોતાને ઓબીસી વાળો એસ.સી. કેટેગરીવાળાને જોઈને અને એસ.સી. વાળો એસ.ટી. વાળાને જોઈને પોતાને ઉંચો કહે છે. જનરલ, ઓબીસી અને એસસી કેટેગરીની જાતિઓ અંદરોઅંદર પણ એકબીજાથી ઉચ્ચ હોવાના દંભ સાથે જીવે છે. આવા દંભી અને સ્વાર્થી હિંદુસમાજથી આપણે એક રાષ્ટ્રનું નિર્માણ કેવી રીતે કરી શકીશું? આપણાથી દૂર ગયેલા એ સત્તર કરોડ મુસ્લિમો અને ત્રણ કરોડ ખ્રિસ્તીઓ આપણી સૌથી મોટી હાર છે. જ્યાં સુધી આપણે તેમને પોતાના નથી બનાવી શકતા ત્યાં સુધી આપણે સાચા હિંદુ કહેવડાવવાને લાયક નથી. હિંદુ તો એ લોકો હતા જે સિંધુ નદીના કિનારે સનાતન વિચારધારાથી જીવતા હતા. જેમના વિચારોમાં દરેક ઉપાસના પધ્ધતિ અને દરેક તત્વજ્ઞાાનને સમાવી લેવાની શક્તિ હતી. હિંદુ સભ્યતા એ હતી જેના ખોળે જે પણ જતો એ પોતાની ઉપાસના પધ્ધતિઓ અને માન્યતાઓનો આધાર ઉપનિષદોના એ અથાગ જ્ઞાાનસાગરમાં મેળવી લેતો અને એ જ હિંદુ સંસ્કૃતિમાં પોતાને ઓગાળી તેનો એક ભાગ બની જતો. પરંતુ જો લોકો પાછળથી એવું ન કરી શક્યા તો એનો અર્થ એ જ છે કે આપણે આપણી વિસ્તૃતતા અને મહાનતા ગુમાવી. આપણે સંકુચિત અને સ્વાર્થી બન્યા. અને જ્યાં સુધી પોતાના જ લોકોથી પોતાને ઉચ્ચ કહી સત્તા ભોગવવાની આ વિકૃતિ આપણામાં છે. હિંદુ સમાજ પુનઃઉત્થાન પામી શકે તેમ નથી. તો ચાલો સાચી હિંદુ વિચારધારા માટે આત્મમંથન કરીએ. ઉત્તિષ્ઠ ભારત…

આ લેખ આપને પસંદ પડ્યો હોય તો 3,જૂન, 2009ના મારાં બ્લોગ ઉપર મૂકેલ એક પોસ્ટ ”

આપણાં ( ભારત ) દેશની એકતા કેટ્લી આભાસી કેટલી  પોકળ અને ભ્રામક ? !! ???”

વાંચવા વિનતિ છે. લીંક નીચે આપી છે.

https://arvindadalja.wordpress.com/%e0%aa%86%e0%aa%aa%e0%aa%a3%e0%aa%be%e0%aa%82-%e0%aa%ad%e0%aa%be%e0%aa%b0%e0%aa%a4-%e0%aa%a6%e0%ab%87%e0%aa%b6%e0%aa%a8%e0%ab%80-%e0%aa%8f%e0%aa%95%e0%aa%a4%e0%aa%be-%e0%aa%95%e0%ab%87%e0%aa%9f/

 

 

Advertisements

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s