“કોંગ્રેસ અને એનસીપી સરકારનું મહારાષ્ટ્રમાં એક ઓર કૌભાંડ !” કરજદાર ખેડૂત કરે આપઘાત કરજદાર નેતા કરે રાજ…..

“કોંગ્રેસ અને એનસીપી સરકારનું મહારાષ્ટ્રમાં એક ઓર કૌભાંડ !”
કરજદાર ખેડૂત કરે આપઘાત કરજદાર નેતા કરે રાજ…..
( ગુજરાત સમાચાર તા. 01/ફેબ્રુઆરી 2011 પ્રસંગપટમાંથી સાભાર )

બેંકે જ્યારે જ્યારે આ લોનના નાણાં વસૂલ કરવાના પ્રયાસો કર્યા ત્યારે મહારાષ્ટ્ર સરકારે એ પ્રયાસો અવરોઘ્યા

દેશના રાષ્ટ્રપ્રમુખનું નામ જાણો છો ? તમે કહેશો, હા. એ તો સાવ સહેલો સવાલ છેઃ પ્રતિભા પાટિલ. પરંતુ તમને એ નહીં ખબર હોય કે પ્રતિભા પાટિલ દેવાદાર છે. એમણે દેશને રૂપિયા ૩૦ કરોડ ૩૧ લાખ ચૂકવવાના છે. પરંતુ ગોસ્વામી તુલસીદાસજી લખી ગયા છે એમ સમરથ કો નહીં દોષ ગુંસાઇ… મોટા કરે એ લીલા, નાના કરે એ છિનાળા… પાંચ-પંદર હજાર રૂપિયાના કરજદાર ખેડૂતો કરજ નહીં ભરી શકવાથી જીવાદોરી ટૂંકાવી દે છે અને કરોડો રૂપિયાની લોન નહીં ભરનારા લોકો આ દેશ પર રાજ કરે છે. તાજેતરમાં પ્રગટ થયેલા આંકડા મુજબ પ્રતિભા પાટિલ સહિત મહારાષ્ટ્રના અડધો ડઝન ટોચના પોલિટિશિયનોએ બેંકની લોનના રૂપિયા ૨૫૪ કરોડ હજુ સુધી ચૂકવ્યા નથી. જરા વિગતે વાત કરવા જેવી છે, નહીં ?

રાષ્ટ્રપ્રમુખ પ્રતિભા પાટિલે સ્થાપેલી અને જેમાં તેમનું નામ એક્ઝિક્યુટિવ ડાયરેક્ટર તરીકે લખાય છે એવા ખાંડ કારખાના સંત મુક્તાબાઇ સુગર ફેક્ટરીએ મુંબઇ ડિસ્ટ્રીક્ટ સેન્ટ્રલ કો-ઓપરેટિવ બેંક પાસેથી લીધેલી રૂા.૩૦ કરોડ ૩૧ લાખ રૂપિયાની લોનના પૈસા હજુ ભરપાઇ કર્યા નથી. અને આ કંઇ એકલદોકલ કિસ્સો નથી. આવી બીજી અડધો ડઝન સુગર ફેક્ટરી દેવાદાર છે. બેંકે જ્યારે જ્યારે આ લોનના નાણાં વસૂલ કરવાના પ્રયાસો કર્યા ત્યારે મહારાષ્ટ્ર સરકારે એ પ્રયાસો અવરોઘ્યા કારણ કે મહારાષ્ટ્રમાં જે બે પક્ષો- કોંગ્રેસ અને એનસીપીનું રાજ છે એ બંનેના નેતાઓ આ ખાંડ કારખાનાના માલિકો છે. બીજા શબ્દોમાં એમ કહી શકાય કે લોન રૂપે લીધેલા પ્રજાના પૈસા પર આ લોકો ચપ્પટ બેસી ગયા છે.
વાસ્તવમાં આ પણ કોંગ્રેસ અને એનસીપીનું એક કૌભાંડ છે. કાયદાની દ્રષ્ટિએ મુંબઇમાં રહેલી સહકારી બેંક મુંબઇની બહારની કંપનીઓને લોન આપી શકે નહીં. એટલે આ પ્રકારની લોન લઇને શાસક પક્ષે કાયદાનો સરિયામ ભંગ કર્યો છે. ઔર એક રસપ્રદ મુદ્દો એ છે કે ખુદ મહારાષ્ટ્ર રાજ્ય સરકાર અને મહારાષ્ટ્ર રાજ્યની તમામ સહકારી બેંકોના પિતા જોવી મહારાષ્ટ્ર સ્ટેટ કો-ઓપરેટિવ બેંક આ લોન માટે ગેરંટર બન્યાં હતાં. કુલ રૂા.૨૫૪ કરોડ આ રીતે ખાંડ કારખાનાં પાસેથી લેવાના નીકળે છે. જો કે આ પ્રશ્ને વાતાવરણ તંગ બને એવી શક્યતા નકારી કાઢી શકાતી નથી કારણ કે મુંબઇ ડિસ્ટ્રીક્ટ સેન્ટ્રલ કો-ઓપરેટિવ બેંકના અઘ્યક્ષ પ્રવીણ દારેકર રાજ ઠાકરેની નવનિર્માણ સેનાના ધારાસભ્ય છે. એમના કહેવા મુજબ અમે તો આ રકમ વ્યાજ સાથે પાછી લેવાના છીએ. જો કે મહારાષ્ટ્ર સ્ટેટ કો-ઓપરેટિવ બેંકે તો ફક્ત સાડા છ કરોડની લોન મંજૂર કરી હતી.

આજે કાંદાના ભાવ આસમાને પહોંચાડનારા એનસીપીના શરદ પવાર ખરા ભરાડી છે. ખાંડ કારખાનાંની લોન માટે ગેરંટર બનેલી મહારાષ્ટ્ર સ્ટેટ કો-ઓપરેટિવ બેંકના કુલ ૪૭ ડાયરેક્ટરોમાંના મોટા ભાગના એનસીપીના ધારાસભ્યો કે હોદ્દેદારો છે. બેંકના ચેરમેન માણિકરાવ પાટિલ રાજ્યના હાલના નાયબ મુખ્ય પ્રધાન અને શરદ પવારના ભત્રીજા અજિત પવારના જિગરી દોસ્ત છે. હવે વાંચો ઘ્યાનથી. નિશ્ચિત સમયમાં લોન કે તેના પૂરેપૂરા હપ્તા નહીં ચૂકવનારા ડિફોલ્ટરની સંપત્તિ લીલામ કરવાની જોગવાઇ સહકારી મંડળી ધારામાં છે. પરંતુ મહારાષ્ટ્રના એક પણ ખાંડ કારખાનાની લીલામી ન થાય કારણ, રાજ્યમાં શાસન જ લોન લેનારાનું છે એટલે કે જાતે કરોડપતિ હોવા છતાં આ બધા કોંગ્રેસીઓ અને એનસીપીના નેતાઓ દેવાદાર છે. લીધેલી લોનના નાણાં પરત કરવાની તેમની દાનત નથી. ખાંડના ભાવ ભલે આસમાને જાય, આ લોકોને ભલે ૨૫૦ થી ૩૦૦ ટકા ચોખ્ખો નફો મળે, લોનના પૈસા પરત ચૂકવવાની તેમની ઇચ્છા હાલ તો જણાતી નથી.

રસપ્રદ વિગત એ છે કે તાજેતરમાં સતારા જિલ્લાની એક સુગર ફેક્ટરી જરંદેશ્વર સુગર ફેક્ટરીની હરાજી બોલી હતી જે કોઇએ પોણા છાસઠ કરોડ રૂપિયામાં ખરીદી લીધી. આ ખાંડ કારખાનું પણ એક કોંગ્રેસી નેતાનું છે. એ કોંગ્રેસી નેતા એટલે શરદ પવારને રાજકારણમાં લાવનારા વસંતદાદા પાટિલનાં પત્ની શાલિનીતાઇ પાટિલ. શાલિનીતાઇ અગાઉ મહારાષ્ટ્ર રાજ્ય સરકારમાં પ્રધાનપદે બિરાજી ચૂક્યાં છે અને ધારાસભ્ય પણ રહી ચૂક્યા છે. તો પછી એમનું કારખાનું કેમ હરાજીનો ભોગ બની ગયું ? કારણ કે એમણે એનસીપીના અઘ્યક્ષ શરદ પવારની ઉગ્ર ટીકા કરી હતી કે એ જીવનજરૂરી ચીજોના ભાવ ઘટાડવા જાણે કરીને કોઇ પગલાં લેતાં નથી. એટલે રાજ્ય સરકારે એમને પાઠ ભણાવવા એમની સુગર ફેક્ટરીની હરાજી કરાવી એવા આક્ષેપો થયા છે. અત્રે એ યાદ કરીએ કે શરદ પવારે પોતાના રાજકીય ગુરૂ વસંતદાદા પાટિલની સરકારને ઊથલાવીને પોતે મુખ્ય પ્રધાન બની બેઠાં ત્યારે પણ શાલિનીતાઇએ એમની આકરી ટીકા કરી હતી.
અત્યારે મહારાષ્ટ્રના કયા કયા પોલિટિશિયનની સુગર ફેક્ટરીના લોનના પૈસા બાકી નીકળે છે ? વાંચો. પ્રતિભા પાટિલવાળી ફેક્ટરીની વાત અગાઉ આવી ગઇ. એ પછી એનસીપીના ધારાસભ્ય સુરેશ વારપુડકરની નરસિંહા સુગર ફેક્ટરીના રૂા.૨૮ કરોડ ૧૩ લાખ, મહારાષ્ટ્ર રાજ્ય કોંગ્રેસ પ્રમુખ રણજિત દેશમુખની રામ ગણેશ ગડકરી સુગર ફેક્ટરીના રૂા.૨૫ કરોડ ૪૭ લાખ, રાજ્યના સ્ટેટ લેવલના પ્રધાન મનોહર નાઇકની સુધાકરરાવ નાઇક સુગર ફેક્ટરીના રૂા.૧૯ કરોડ ૯૭ લાખ અને કોંગ્રેસ સંસદ સભ્ય રજની પાટિલની વિઠ્ઠલરાવ વિખે-પાટિલ સુગર ફેક્ટરીના રૂા.૧૩ કરોડ ૬૫ લાખ બાકી નીકળે છે.

Advertisements

3 comments

  1. આદરણિય અરવિંદકાકા ..
    આપણા રાજનેતાઓમા મોરાલિટિ જેવુ કશુજ નથિ?દુર દુર સુધિ એક પણ નેતા દેખતો નથિ જેના પર વિશ્વાશ કરિ શકિએ………. આપના બ્લોગ થકિ ગણુ જાણવા મળે છે……THANKS

    Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s