મારા બ્લોગની બે વર્ષની યાત્રા……!!!

11 ઓગસ્ટ 2010
વ્હાલા મિત્રો અને વડિલો

જીવનમાં ઉભી થયેલી એકલતા અને ખાલીપાએ મારી દીકરીના આગ્રહથી અને વર્ડપ્રેસના ગુજરાતી બ્લોગ શરૂ કરવાના સમાચારે મને પણ મારાં વિચારોને શબ્દસ્થ કરવા પ્રેર્યો અને શરૂ થઈ બ્લોગ ઉપર લખવાની આ યાત્રા..

ગુજરાતીમાં લખવા ગુજરાતી સોફ્ટવેર ડાઉન લોડ તો દીકરીએ કરી આપ્યું પણ ગુજરાતી ટાઈપ કોણ કરી આપે ? સૌ પ્રથમ ગુજરાતી ટાઈપ શીખવાનું ચાલુ કર્યુ અને સૌ પ્રથમ ગણપતિ વિષે બ્લોગ ઉપર મારાં વિચારો રજૂ કરી બ્લોગના શ્રી ગણેશ કર્યા ! આમે ય આપણાં સમાજમાં કોઈ પણ શુભ કામની શરૂઆત ગણપતિની સ્થાપના કર્યા બાદ જ થતી હોય છે ને ? કદાચ તે માટે જ મને સૌ પ્રથમ ગણપતિ વિષે જ લખવાનું સુજ્યું હોવા સંભવ છે.

બ્લોગ ઉપર લખવાની શરૂઆત કરતા જ અનેક મિત્રોએ મને બ્લોગની મુલાકાત લઈ પ્રતિભાવો દ્વ્રારા પ્રોત્સાહિત કર્યો પરિણામે આજે મારી બ્લોગની આ યાત્રાને 2 વર્ષ પૂરા થઈ રહ્યા છે. આ બે વર્ષની યાત્રા દરમિયાન મારાં બ્લોગ ઉપર અંદાજે 102 વિષયો ઉપર મારા વિચારોની પોષ્ટ મૂકેલ હતી જેમાંથી અંદાજે 14 પોષ્ટ મારાં વિચારો સાથે સામ્ય ધરાવતી હોઈ અન્ય લેખકો જેવા કે સર્વશ્રી મોહમ્મ્દ માંકડ ગુણવંત શાહ અને ઉર્વીશ કોઠારી તથા મધુસુદન પારેખના લેખો સંદેશ દિવ્ય ભાષ્કર અને ગુજરાત સમાચારની સાપ્તાહિક પૂર્તિમાંથી આપ સૌના લાભાર્થે રજુ કરેલી.

આ બે વર્ષ્ દરમિયાન બ્લોગ ઉપર 21.000/- એકવીસ હજારથી વધારે ક્લીક મળી ચૂકી છે અને બ્લોગની મુલાકાત લેનારા મિત્રોમાંથી અંદાજે 1280 આસપાસ પ્રતિભાવો પણ મળ્યા છે જેનાથી મને ખૂબ જ પ્રોત્સાહન તો મળ્યું જ છે પણ મને નવા નવા વિષયો ઉપર વાંચવા અને વિચારી તેના ઉપર મારાં વિચારોને વ્યકત કરવા તક મળતા મારી એકલતા અને ખાલીપો અંશતઃ ભરાઈ ગયો હોય તેમ સંવેદી રહ્યો છું. આ બ્લોગની પ્રવૃતિ મને માનસિક રીતે ખૂબ જ વ્યસ્ત રાખે છે ! જાણે મારા રોજીંદા જીવનનો એક અવિભાજ્ય હિસ્સો ના બની ગયો હોય !

કેટલાક બલોગર મિત્રો સાથે મારી અંગત લાગણીઓ પણ શેર કરી શકાય તેવી આત્મીયતા કેળવી શકાઈ છે ! આજના આ દિવસે આપ સૌ બ્લોગર મિત્રો તરફ કૃતજ્ઞતા વ્યકત કરુ છું અને સાથોસાથ આવનારા દિવસોમાં પણ આપસૌનો આવી જ રીતે લાગણી અને હુંફ ભર્યો સાથ-સહકાર અને પ્રોત્સાહન મળતા રહેશે તેવી અપેક્ષા સાથે પરમકૃપાળુ પરમાત્માને પ્રાર્થના કરું છું !

આપ સૌની ક્ષેમ કુશળતા ઈચ્છ્તો
સ-સ્નેહ
અરવિંદ