શું મંદિરમાં ઈશ્વર હોય છે ?

કેટલાક સમય થયા કેટલાક  મંદિરોમાં દર્શન કરવા જવાની કેટલીક જાણીતી હસ્તિઓમાં- અગાઉ થી જાહેરાત કરી મિડીઆ વાળાઓને હાજર રાખી- એક પ્રકારની  ઘેલછા ઉપડી હોય તેવુ જણાય છે. અને આવી હસ્તિઓ દર્શને આવે ત્યારે સત્તાધીશો-જે તે મંદિરના ટ્રસ્ટીઓ-સામાન્ય ભક્તોની કોઈ પરવા કરતા જણાયા નથી. સામાન્ય દર્શનાર્થીઓ કલાકો સુધી ઉઘાડા મેદાનમાં દર્શન માટે રાહ જોતા ઉભા રહે અરે ધૂમ તાપમાં શેકાયા કરતા હોય છે  કારણકે મોટી હસ્તીઓ દર્શનાર્થે પધારી હોય તેમની સેવા અને સવલતો જાળવવામાં અને આ વીઆઈપીઓની લાભાર્થે  તેમને કતારમાં આવવા કોઈ ફરજ પડાતી નથી પરંતુ તેઓને દર્શન માટે પ્રાથમિકતા આપવામાં આવે છે અને સામાન્ય લોકો ભૂલાય જતા હોય છે.અને આ બધો માત્ર પૈસાનો જ પ્રભાવ છે તેમ સ્પષ્ટ જણાય છે. ઉપરાંત્ મને તો ક્યારેક એવું લાગે છે કે આ કહેવાતા કે થઈ પડેલા વીઆઈપીઓ સામાન્ય લોકો ઉપર પોતાનો પ્રભાવ પાડવા જ આવું આયોજન કરતા હોવા જોઈએ. કારણકે  આમાંના કોઈ એ આવી વિશિષ્ટ સગવડનો ઈંકાર કરી અને સામાન્ય દર્શનાર્થીની જેમ જ કતારમાં દર્શન કરવા ઈચ્છા વ્યકત કરી હોય તેવું જાણ્યું નથી. મને તો ક્યારેક એવું પણ લાગ્યું છે કે આવા લોકો સામાન્ય લોકોને દર્શનમાટે કલાકો સુધી તાપ અને તડ્કો કે ક્યારેક ઠંડી તો ક્યારેક્ વરસાદમાં હેરાન થતા જોઈ પરપીડન વૃતિથી પાશવી આનંદ માણતા હોવા જોઈએ.  આથી આ કહેવાતા ટ્રસ્ટીઓ ઈશ્વરના નામે વેપાર જ કરતા હોય તેમ લાગ્યા વગર રહેતું નથી. કોઈ પણ મોટા મોલ કે શો-રૂમમાં ખરીદી માટે કોઈ મોટી હસ્તિ આવેછે ત્યારે આવા મોલ કે શો-રૂમના માલિકો કે કર્મચારીઓ આવી જ રીતે આગતા-સ્વાગતા કરતા આપ સૌએ જોયા હશે. જે મંદિરમાં ભક્તો વચ્ચે આ જાતના ઉઘાડા ભેદભાવ હોઈ તેવા મંદિરોમાં ઈશ્વર રહી શકે ખરો ? કહેવાતા સાધુ-બાવાઓ કે ગૂરુઓ ઈશ્વરને નામે આવા ભેદભાવ કરતા રહે છે તે આપણો સૌનો અનુભવ નથી ? એક્ એવો પ્રશ્ન પૂછવાનું પણ મન થાય છે કે કોઈ ને કોઈ  ખાસ મંદિરના  ઈશ્વરમાં જ  શ્રધ્ધા હોય અને તે ત્યાં દર્શનાર્થે જાય તો એમાં શું ખોટું છે ? ઈશ્વરમાં શ્રધ્ધા હોવી તે તો એક સરસ વાત છે. કોઈ પણ વ્યક્તિ માટે  તેની માન્યતાનો વિશિષ્ટ  ઈશ્વર હોય શકે અને તેની આરાધના કરવી તે તેનો અંગત મામલો છે.જે માટે તેને પૂરી સ્વતંત્રતા છે. પરંતુ એક વાત તો સ્પષ્ટ જ છે કે કોઈ ઈશ્વર આવા ભેદભાવ કરવાનું કહેતો નથી. કે નથી કહેતા કોઈ ધાર્મિક આચાર-વિચાર. ઈશ્વરના દરબારમાં સૌ સમાન છે પછી તે શ્રીમંત હોય કે દીન્ રાજા હોય કે રંક પરંતુ આવા ભેદભાવ તો ભક્તિનો ડોળ્/દંભ કરનારાઓ જ કરાવતા હોય છે કારણ કે તેમને સમાજમાં પોતે ખૂબ ધાર્મિક છે તેવી પ્રતિભા ઉભી કરી અનેક જાતના લાભો મેળવવાની ગણત્રી અને વૃતિ રહેલી હોય છે. અને ધાર્મિકતાના ઓઠા હેઠળ બની બેઠેલા આવા ટ્રસ્ટીઓ ખૂબ જ સહેલાઈ થી આવા ઢોગી ભક્તો પાસે વેંચાય જતા હોય છે અને સામાન્ય ભક્તોની કોઈ પરવા કે સગવડ્તા કે સવલતો આપવાની જરૂરિયાત પણ મહેસુસ કરતા હોતા નથી. અને જ્યારે આવા કહેવાતા શ્રીમંત લોકો દર્શને આવે છે તે પણ પોતે ખૂબ ભકત અને ધાર્મિક છે તેવી છાપ ઉભી કરવા જ આવતા હોય છે. ઈશ્વરનો સાચો ભક્ત હમેશા અન્યની તકલીફની ચિંતા કરતો હોય છે અને પોતાના કારણે તો બીજા કોઈને પણ નાની એવી તકલીફ કે મુશ્કેલી ના પડે તે અંગે સતત સભાન અને સતર્ક રહે છે. જ્યારે અહીં તો ઈશ્વર અને તેમના નામનો જાણે વેપાર ગોઠવાઈ ગયો હોય તેવું લાગ્યા કરે છે. મારાં ચિત્તમાં ઈશ્વરની એક કલ્પ્નામૂર્તિ ઘડાયેલી છે અને કદાચ સૌના ચિત્તમાં તેની પોતાની ઈશ્વરની છ્બી હશે જ તે કલ્પના કે છબી સાથે જે મંદિરોમાં ઈશ્વરની પ્રતિમા કે મૂર્તિના સ્થૂળ ભાવે દર્શન કરવામાં આટ્લો ભેદભાવ રખાતો હોય તેવા મંદિરોમાં ઈશ્વર હોઈ શકે ખરો તેવી મને વારંવાર શંકા થયા કરે છે. શું ઈશ્વર પણ આવા દંભી લોકોનો મોહ્તાજ છે ? આપ શું માનો છો મંદિરમાં ઈશ્વર હોઈ શકે ખરો  ?